नाशिक मिरर वेबटीम: शाळांसोबतच क्लासेस सुरू करण्याचा निर्णय शहरातील खासगी कोचिंग क्लासचालक संघटनेमार्फत घेण्यात आला होता. परंतु, शाळा सुरू करण्याचा निर्णय चार जानेवारीनंतर घेतला जाणार असल्याने, खासगी क्लासेस पुन्हा अडचणीत सापडले असून, खाजगी क्लासेस घेऊन आपला उदरनिर्वाह करणारे शिक्षक आर्थिक संकटात सापडले आहेत.अनेक क्लासेस हे भाडेतत्व अथवा कर्ज काढून क्लासेस च्या इमारती बांधल्या आहेत.व इतर अत्याधुनिक साधन सामुग्री साठी देखील पैसे गुंतवले आहेत.यामुळे हे सर्व कर्ज भरायचे कसे असे संकट खाजगी क्लास चालकांवर उभे राहिले आहे.मार्च महिन्यामध्ये लॉकडाउन जाहीर झाल्यापासून खासगी क्लासेसना लागलेले कुलूप अद्यापही कायम आहे. शाळांमधील शिक्षकांचे वेतन सुरू असले तरी यामुळे मध्यम तसेच लहान क्लासचालक अडचणीत सापडल्याचे चित्र आहे. गेल्या आठ महिन्यांपासून या क्लासचालकांना आर्थिक अडचणींचा सामना करावा लागत आहे. राज्य सरकारने २३ नाव्हेंबरपासून नववी ते बारावीचे वर्ग सुरू करण्यास शाळांना परवानगी दिल्याने खासगी क्लास सुरू करण्याचा मार्गही मोकळा झाला होता. त्यानुसार या क्लास चालकांनी एकत्र येऊन नियोजनही केले होते. परंतु, ‘कोविड-१९’ची परिस्थिती लक्षात घेता जिल्ह्यातील शाळा चार जानेवारीनंतर सुरू करण्याचा निर्णय स्थानिक प्रशासनामार्फत घेण्यात आल्याने, खासगी क्लासेस सुरू होण्यात पुन्हा एकदा अडचणी निर्माण झाल्या आहेत. तरीही क्लास सुरू करण्यास परवानगी देण्याची मागणी कायम असल्याची माहिती कोचिंग क्लास संचालक संघटनेचे अधयक्ष जयंत मुळे यांनी दिली.
याबाबत मुळे म्हणाले की, दहा ते पंधरा विद्यार्थ्यांसह नियमांचे पालन करून क्लासेस सुरू करण्यास परवानगी देणे गरजेचे आहे. महिनाभर हा प्रयोग करून पाहायला हवा. कोणतेही आरोग्य संकट न उद्भविल्यास याच आधारावर शाळा सुरू करणे सरकारला शक्य होणार आहे. गेल्या आठ महिन्यांपासून अनेक क्लास चालक आर्थिक संकटात आहेत. त्यामुळे क्लासेस सुरू करण्यास परवानगी देणे गरजेचे आहे.
