नाशिक मिरर : वृत्तसेवा सातपूर येथील पपया नर्सरी परिसरात चार ते पाच जणांनी एका तरुणाचे अपहरण करण्याचा प्रयत्न केला. मात्र, प्रसंगावधानाने युवकाने संधी साधत पळ काढल्याने त्याचा जीव वाचला. ही घटना बुधवारी (दि.१७) दुपारी घडली.
तेजस धाडगे (२४, रा. मोतीवाला कॉलेज, ध्रुवनगर) असे अपहरणातून बचावलेल्या तरुणाचे नाव आहे. पोलिसांनी दिलेल्या माहितीनुसार, संशयित गिरीश शिंगोटे (रा. सिंहस्थनगर) याच्या प्रेयसीसोबत लग्न केल्याचा राग मनात धरून तेजसचे अपहरण करून त्याची हत्या करण्याचा कट रचला होता.
घटनेप्रमाणे, तेजस धाडगे हा बुधवारी दुपारी पपया नर्सरीजवळील हिंद सोसायटी परिसरातील चहाच्या टपरीवर आपल्या मित्राला भेटण्यासाठी गेला असता, शिंगोटे चारचाकी (एमएच ०६ एएस ५५१७) घेऊन चार-पाच साथीदारांसह आला. त्यांनी तेजसला मारहाण करून मोबाइल हिसकावला व जबरदस्तीने वाहनात बसवून नेले.
त्र्यंबक रोडवरील शिव हॉस्पिटलजवळ संधी मिळताच तेजसने वाहनातून पळ काढून पपया नर्सरी पोलिस चौकी गाठली. त्याच्या फिर्यादीवरून गिरीश शिंगोटे, अक्षय पवार, शैलेश कुवर व इतरांविरोधात अपहरणाचा गुन्हा दाखल करण्यात आला आहे.
या घटनेचा परिसरातील काहींनी व्हिडिओ काढल्याने तो तपासासाठी पोलिसांच्या ताब्यात घेण्यात आला असून पुढील तपास सुरू आहे.