पाल्यांच्या क्रीडा स्पर्धेत पालकांचाही सहभाग
नाशिक मिरर : वृत्तसेवा प्रजासत्ताक दिनाचे औचित्य साधत राजीवनगर येथील बिग ड्रीम्स प्रीस्कूलने आपला वार्षिक स्पोर्ट्स डे साजरा केला. विद्यार्थ्यांच्या या क्रीडा स्पर्धेत त्यांच्या पालकांनीही सहभाग नोंदवत स्पोर्ट डे चा आनंद द्विगुणीत केला.
कार्यक्रमाच्या अध्यक्षस्थानी स्केटिंग असोसिएशन ऑफ महाराष्ट्रच्या प्रमुख सविता बुळंगे उपस्थित होत्या. शाळेचे संस्थापक एम.के.सिंह आणि संचालक डॉ.अनिमेश पाटील यांच्या हस्ते ध्वजारोहण करत कार्यक्रमाला सुरुवात करण्यात आली. यावेळी चिमुकल्या योगींनी सूर्यनमस्कार सादर करत उपस्थितांची दाद मिळवली. यावेळी लिटिल चॅम्प्सनी टर्टल रेस, शटल रेस, हर्डल रेस आणि इतर अनेक क्रीडा स्पर्धा सादर केल्या. या कार्यक्रमाचे वैशिष्ट्य म्हणजे विविध क्रीडा स्पर्धांमध्ये विद्यार्थ्यांच्या पालकांनी सहभाग नोंदवल्याने कार्यक्रमात उत्साह संचारला होता.
दरम्यान, क्रीडा स्पर्धेतील यशस्वी विद्यार्थ्यांना बक्षीस वितरणाने गौरविण्यात आले. संस्थेच्या मुख्याध्यापिका तान्यासिंग पाटील यांनी उपस्थितांचे आभार मानले. कार्यक्रम यशस्वीतेसाठी बिग ड्रीम्स प्रीस्कूलचे सर्व शिक्षक शिक्षकेतर कर्मचारी यांनी परिश्रम घेतले.