नाशिक मिरर वृत्तसेवा :

अक्कलकोट निवासी श्री स्वामी समर्थ महाराजांच्या भक्तिभावाला सुरेल अभिव्यक्ती देणारे ‘स्वामी आहे उभा’ हे नवीन भक्तिगीत नुकतेच ‘गजर देवाचा’ या यूट्यूब चॅनेलवर प्रदर्शित करण्यात आले असून, अल्पावधीतच या गीताला स्वामीभक्तांकडून उत्स्फूर्त प्रतिसाद मिळत आहे. श्रद्धा, विश्वास, समर्पण आणि स्वामी समर्थांच्या कृपेचा संदेश देणारे हे गीत भक्तांच्या मनाला स्पर्श करत असून सोशल मीडियावरही त्याची मोठ्या प्रमाणात चर्चा होत आहे.

या भक्तिगीताची निर्मिती आकाश आरगडे यांनी केली आहे. सुप्रसिद्ध गायक अवधूत गांधी यांनी आपल्या भावपूर्ण आणि प्रभावी आवाजातून या गीताला भक्तिरसाची अनोखी उंची दिली आहे. तर संगीतकार सर्वेश साबळे यांनी भक्तिमय वातावरण निर्माण करणारे सुरेल संगीत दिले आहे. गीतातील शब्द, संगीत आणि गायनाचा उत्तम संगम श्रोत्यांना स्वामी समर्थांच्या भक्तीत तल्लीन करून टाकतो.

गीताच्या प्रदर्शनानंतर विविध सोशल मीडिया प्लॅटफॉर्मवर स्वामीभक्तांकडून सकारात्मक प्रतिक्रिया उमटत आहेत. अनेकांनी हे गीत ऐकल्यानंतर मनःशांती, आध्यात्मिक समाधान आणि सकारात्मक ऊर्जा मिळाल्याची भावना व्यक्त केली आहे. तसेच स्वामी समर्थांप्रती असलेली श्रद्धा अधिक दृढ झाल्याचेही अनेक भक्तांनी सांगितले आहे.

निर्माते आकाश आरगडे यांनी सांगितले की, ‘स्वामी आहे उभा’ हे केवळ एक भक्तिगीत नसून स्वामी समर्थांच्या चरणी अढळ श्रद्धा, विश्वास आणि समर्पण व्यक्त करणारा आध्यात्मिक अनुभव आहे. आजच्या धकाधकीच्या जीवनात प्रत्येक भक्ताला मानसिक शांती आणि आध्यात्मिक बळ मिळावे, या उद्देशाने या गीताची निर्मिती करण्यात आली आहे.

संगीतकार सर्वेश साबळे यांनी पारंपरिक भक्तिरस आणि आधुनिक संगीतशैलीचा सुंदर मेळ घालत हे गीत अधिक प्रभावी करण्याचा प्रयत्न केला आहे. तर गायक अवधूत गांधी यांच्या भावस्पर्शी आवाजामुळे गीताची भक्तिमय अनुभूती अधिक गडद झाली आहे.

सध्या हे भक्तिगीत ‘गजर देवाचा’ या यूट्यूब चॅनेलवर उपलब्ध असून, अधिकाधिक स्वामीभक्तांनी हे गीत ऐकून स्वामी समर्थांच्या भक्तीचा आनंद घ्यावा, तसेच गीताला लाईक, शेअर आणि सबस्क्राइब करून हा भक्तिसंदेश घराघरात पोहोचवावा, असे आवाहन निर्मात्यांनी केले आहे.