लूटमारीचे प्रकार वाढले
नाशिक मिरर वृत्तसेवा : सातपूर एमआयडीसीमधील महिंद्रा सर्कल ते इंडियन टूल्स कंपनीपर्यंतचा प्रमुख रस्ता गेल्या ५ ते ७ दिवसांपासून पूर्ण अंधारात आहे. या मार्गावरील स्ट्रीट लाइट्स बंद असल्याने नागरिकांना रात्रीच्या वेळी अत्यंत गैरसोयीला सामोरे जावे लागत आहे.
जय इलेक्ट्रॉनिक्स, बॉश, व इंडियन टूल्ससारख्या औद्योगिक कंपन्यांच्या परिसरात हा रस्ता असून कामगारांची व वाहनांची मोठी वर्दळ असते. मात्र, दिवे बंद असल्याने संपूर्ण मार्ग काळोखात झाकोळला जातो, आणि यामुळे अपघाताची शक्यता वाढली आहे.तसेच चोरी व लूटमारी चे प्रमाण मोठ्या प्रमाणात वाढले आहे. स्थानिक नागरिक आणि कामगारांनी याबाबत नाशिक महानगरपालिककडे तक्रार करून देखील अद्याप कोणतीही कारवाई करण्यात आलेली नाही. दररोज शिफ्टनुसार कामावर येणाऱ्या कामगारांना व महिला कामगारांना सायंकाळी ७ ते ८ वाजे दरम्यान अंधारात प्रवास करावा लागत असल्याने असुरक्षिततेची भावना निर्माण झाली आहे.
प्रशासनाने त्वरित लक्ष देऊन स्ट्रीट लाइट्स कार्यान्वित करावेत, अशी मागणी सामाजिक कार्यकर्ते मनोज आहिरे यांसह नागरिकांनी केली आहे.