नाशिक मिरर वृत्तसेवा :

नाशिक जिल्ह्यातील गंगापूर धरणाच्या बॅकवॉटर परिसरात गुरुवारी अत्यंत हृदयद्रावक दुर्घटना घडली. फिरण्यासाठी गेलेल्या एकाच कुटुंबातील चार जणांचा पाण्यात बुडून दुर्दैवी मृत्यू झाला. या घटनेत एका २२ वर्षीय विवाहित तरुणीसह तीन अल्पवयीन मुलांचा मृत्यू झाल्याने संपूर्ण नाशिक जिल्ह्यावर शोककळा पसरली आहे.

मिळालेल्या माहितीनुसार, मौजे सावरगाव परिसरातील गंगापूर धरणाच्या बॅकवॉटर भागात काही कुटुंबीय फेरफटका मारण्यासाठी गेले होते. यावेळी पाण्याचा खोलीचा अंदाज न आल्याने एकजण खोल पाण्यात जाऊन बुडू लागला. त्याला वाचवण्यासाठी इतर तिघांनी प्रयत्न केला; मात्र पाण्याचा प्रवाह आणि खोलीचा अंदाज न आल्याने चौघेही पाण्यात ओढले गेले. काही क्षणांतच ही आनंदाची सहल दुर्दैवी दुर्घटनेत बदलली.

घटनेची माहिती मिळताच स्थानिक नागरिकांनी तातडीने गंगापूर पोलीस ठाणे आणि अग्निशमन दलाला कळविले. घटनास्थळी दाखल झालेल्या बचाव पथकाने तातडीने शोधमोहीम सुरू केली. अथक प्रयत्नांनंतर चौघांचेही मृतदेह पाण्यातून बाहेर काढण्यात आले.

मृतांची नावे या दुर्घटनेत मृत्यूमुखी पडलेल्यांची नावे पुढीलप्रमाणे आहेत :मयुरी पवन जाधव (वय २२ वर्षे), रा. अंजनेरी, ता. त्र्यंबकेश्वर,गणेश सुरेश गोतरने (वय १६ वर्षे), रा. सावरगाव,निखिल मच्छिंद्र गोतरने (वय १५ वर्षे), रा. सावरगाव,साहिल मनोहर गोतरने (वय १६ वर्षे), रा. सावरगाव मृत झालेले तिन्ही अल्पवयीन मुले सखे चुलत भाऊ असल्याची माहिती समोर आली आहे. अपघाताची बातमी समजताच कुटुंबीयांवर दुःखाचा डोंगर कोसळला असून सावरगाव व परिसरात हळहळ व्यक्त केली जात आहे.परिसरात शोककळाघटनेनंतर परिसरात मोठी गर्दी झाली होती. नातेवाईकांचा आक्रोश पाहून उपस्थित नागरिकांचेही डोळे पाणावले. एका क्षणात चार जणांचा जीव गेल्याने संपूर्ण गावात शोकमय वातावरण निर्माण झाले आहे.

पोलिसांचा तपास सुरू :

गंगापूर पोलिसांनी या प्रकरणी अपघाती मृत्यूची नोंद केली असून घटनेचा अधिक तपास सुरू आहे. मृतदेह शवविच्छेदनासाठी जिल्हा रुग्णालयात पाठविण्यात आले आहेत.

प्रशासनाचे नागरिकांना आवाहन :

दरम्यान, पावसाळ्याच्या पार्श्वभूमीवर धरणे, तलाव आणि बॅकवॉटर परिसरात पाण्याची खोली व प्रवाहाचा अंदाज बांधणे कठीण असते. त्यामुळे नागरिकांनी अशा ठिकाणी पाण्यात उतरणे टाळावे, सुरक्षिततेचे नियम पाळावेत आणि धोकादायक ठिकाणी सेल्फी किंवा पोहण्याचा मोह टाळावा, असे आवाहन प्रशासनाने केले आहे.

वाढत्या दुर्घटनांमुळे चिंता:

नाशिक जिल्ह्यातील विविध धरणे व जलाशयांमध्ये बुडून मृत्यू होण्याच्या घटनांमध्ये वाढ होत असल्याने स्थानिक नागरिकांनी सुरक्षा उपाययोजना वाढविण्याची मागणी केली आहे. धोकादायक भागांमध्ये इशारा फलक, सुरक्षा रक्षक आणि प्रतिबंधात्मक उपाय तातडीने राबविण्याची गरज व्यक्त केली जात आहे.

“गंगापूर धरणातील ही दुर्घटना केवळ एका कुटुंबासाठीच नव्हे तर संपूर्ण नाशिकसाठी वेदनादायी ठरली आहे. निष्काळजीपणाचा एक क्षण चार निष्पाप जीवांवर बेतला.”

— Nashik Mirror